आर्टिकल्स पेपर, काठमाडौँ । नेपाल नगरपालिका सङ्घको अध्यक्षमा धादिङस्थित नीलकण्ठ नगरपालिकाका प्रमुख भीम ढुंगाना निर्वाचित हुनुभएको छ ।
संघको आठौं महाधिवेशनले नेपाली कांग्रेसबाट निर्वाचित ढुंगानालाई अध्यक्षमा सर्वसम्मत चयन गरेको हो । महाधिवेशनले ४३ सदस्यीय कार्यसमिति गठन गरेको छ ।
उपाध्यक्षमा सिन्धुपाल्चोकको चौतारासाँगागढी नगरपालिकामा नेकपा माओवादी केन्द्रबाट निर्वाचित नगरपालिका प्रमुख कृष्णप्रसाद सापकोटा चयन हुनुभएको छ ।
यस्तै महासचिवमा दाङको घोराही उपमहानगरपालिकाका मेयर नरुलाल चौधरी चयन हुनुभएको छ, उहाँ नेकपा एमालेका तर्फबाट हुनुहुन्छ ।
यस्तै संघले उपमहासचिवमा काठमाडौं महानगरपालिकाकी उपप्रमुख सुनिता डंगोल चयन गरेको छ ।
त्यसै गरी कोषाध्यक्षमा खोटाङको हलेसी तुवाचुङ नगरपालिका प्रमुख विमला राई चयन हुनुभएको छ, उहाँ नेपाली कांग्रेसबाट हुनुहुन्छ । यसैगरी सहकोषाध्यक्षमा हेटौंडा उपमहानगरपालिकाकी प्रमुख मीना लामा चयन हुनुभएको छ । उहाँ एकीकृत समाजवादीको तर्फबाट हुनुहुन्छ ।
देशभरिका २ सय ९३ नगरपालिकाका जननिर्वाचित प्रतिनिधिबाट ५ वर्षको लागि नयाँ कार्यसमिति चयन भएको हो । स्थानीय तहको निर्वाचन भएपछि पालिकामा जित हासिल गरेको पार्टीको संख्याअनुसार संघको भागवण्डा भएको हो ।
