रास्वपा सभापति लामिछानेद्वारा विजयादशमीको शुभकामना, विपत्तिमा एकताबद्ध हुन आह्वानरामेछापमा मतदान टोली दुर्घटनामा परेपछि वैकल्पिक कर्मचारी खटाइयो
२०८२ फागुन १९ मंगलवार १३:४२
1.83K
shares
shares
रामेछाप । मतदानका लागि खटिएका कर्मचारी सवार गाडी सोमबार दुर्घटनामा परेपछि रामेछापका तीन मतदान केन्द्रमा मंगलबार पुनः कर्मचारी र निर्वाचन सामग्री पठाइएको छ ।
रामेछाप नगरपालिका-२ देउरालीस्थित शीतलादेवी मावि र सिरुवारी मतदान केन्द्र तथा वडा नम्बर ३ को वडा कार्यालय भवन साँघुटारका लागि खटिएका कर्मचारी र मतदान सामग्री बोकेको सवारी देउरालीको सिरुवारीमा दुर्घटनामा परेको थियो ।
दुर्घटनामा प्रहरी सहायक निरीक्षक परशुराम यादव र साँघुटारका मतदान अधिकृत डोरप्रसाद घिमिरेको मृत्यु भएको छ । अन्य सात कर्मचारी घाइते भएका छन् । घाइतेहरूलाई उपचारका लागि काठमाडौं पठाइएको छ र सैनिक अस्पतालमा उपचार भइरहेको जनाइएको छ ।
मतदान अधिकृतको निधन र अन्य कर्मचारी घाइते भएपछि प्रभावित केन्द्रमा वैकल्पिक कर्मचारी खटाइएको मुख्य निर्वाचन अधिकृतको कार्यालय रामेछापले जनाएको छ । दुर्घटनामा मतपत्र, मतपेटिका लगायतका केही सामग्री क्षति भएकाले त्यसको सट्टामा नयाँ सामग्री पनि पठाइएको छ ।
यसैबीच, घिमिरेको मंगलबार मन्थलीस्थित तामाकोसी घाटमा अन्त्येष्टि गरिएको छ । उनी रुद्राक्षेश्वर मावि, मन्थली-७ मुगिटारका निमावि द्वितीय शिक्षक थिए । प्रहरी सहायक निरीक्षक यादवको शव भने अन्त्येष्टिका लागि गृह जिल्ला सप्तरी पठाइएको छ ।
