काठमाडौं । निर्वाचन आउन १६ दिन मात्र बाँकी रहँदा बैंक तथा वित्तीय संस्थामा चुनावी खाता खोल्ने उम्मेदवारको संख्या बढ्दै गएको छ । निर्वाचन आयोगले यस वर्षदेखि चुनावी खर्च अनिवार्य रूपमा बैंक खातामार्फत गर्नुपर्ने व्यवस्था लागू गरेपछि उम्मेदवारले धमाधम खाता खोल्न थालेका हुन् ।

आयोगका सहसचिव एवं प्रवक्ता नारायणप्रसाद भट्टराईका अनुसार प्रत्यक्षतर्फका तीन हजार ४०६ उम्मेदवारमध्ये हालसम्म ६७१ जनाले बैंक तथा वित्तीय संस्थामा चुनावी खाता खोलेका छन् ।

यसअघिका निर्वाचनमा दल र उम्मेदवारलाई बैंक खातामार्फत खर्च गर्न अनिवार्य व्यवस्था गरिएको थिएन । तर, यस वर्षदेखि निर्वाचन खर्च पारदर्शी बनाउन आयोगले बैंकिङ प्रणालीमार्फत मात्रै खर्च गर्नुपर्ने बाध्यकारी प्रावधान लागू गरेको छ । यस व्यवस्थाले आर्थिक अनुशासन कायम गर्नुका साथै चुनावी खर्च पारदर्शी हुने आयोगको विश्वास छ ।

आयोगले भूगोलका आधारमा उम्मेदवारलाई २५ लाखदेखि ३३ लाखसम्म खर्च गर्न पाउने सीमा तोकेको छ । आर्थिक अनुशासन सुदृढ गर्ने उद्देश्यले यस्तो व्यवस्था गरिएको आयोगले जनाएको छ ।

कालिकोटजस्ता दुर्गम जिल्लाका सबै उम्मेदवारले खाता खोलिसक्दा सुगम जिल्लाका धेरै उम्मेदवारले अझै खाता नखोलेको अवस्था छ । नेपाल राष्ट्र बैंकका अनुसार ७५३ वटै स्थानीय तहमा बैंक तथा वित्तीय संस्थाका शाखा विस्तार भइसकेका छन् । आयोगले २५ हजारभन्दा बढी रकम बैंक खातामार्फत मात्रै लेनदेन गर्नुपर्ने व्यवस्था गरेको छ ।

यस विषयमा आयोगले सोमबार बैंक तथा वित्तीय संस्थाका प्रमुख कार्यकारी अधिकृतहरूसँग छलफल गरेको थियो । छलफलका क्रममा कार्यवाहक प्रमुख निर्वाचन आयुक्त रामप्रसाद भण्डारीले बैंकिङ प्रणालीमार्फत चुनावी खर्च गर्दा पारदर्शिता सुनिश्चित हुने उल्लेख गर्नुभयो । हातहातमा नगद लिएर चुनावी खर्च गर्न नपाइने व्यवस्था गरिएको र त्यसका लागि छुट्टै निर्देशिका जारी गरिएको जानकारी पनि उहाँले दिनुभयो ।