काठमाडौं । आईसीसी क्रिकेट विश्वकप लिग टूमा तेश्रो हुँदै विश्वकपको ग्लोबल क्वालिफायरमा स्थान बनाउन सफल नेपाल राष्ट्रिय क्रिकेट टिमका खेलाडीलाई प्रधानमन्त्री पुष्पकमल दाहाल प्रचण्डले सम्मान गरेका छन् ।
शुक्रबार बिहान वालुवाटारमा भएको कार्यक्रममा प्रधानमन्त्रीले नेपाली टिमका सबै सदस्यलाई सम्मान गरेका हुन् ।
नेपालले बिहीबार घरेलु मैदानमा यूएईलाई ९ रनले पराजित गर्दै क्रिकेट विश्वकप लिग टु को तेस्रो स्थानमा रहेर विश्वकप क्वालिफायरमा स्थान पक्का गरेको थियो ।
खेलाडीलाई सम्मान गर्दै तपाईँहरूले मात्र जित्नुभएको छैन, देशले जितेको छ, देशको स्वाभिमान उच्च भएको छ, राष्ट्रको गौरव बढेको छ । आगामी दिनमा समेत तपाईहरूको प्रर्दशन थप राम्रो होस् भन्दै प्रधानमन्त्रीले दाहालले खुसी व्याक्त गर्दै शुभकामना व्यक्त गरेका थिए ।
