लोकतन्त्रमाथिको दमन स्वीकार्य छैन : शेरबहादुर देउवाकोलम्बियामा सैन्य विमान दुर्घटना : ६६ जनाको मृत्यु , उद्धार कार्य जारी
२०८२ चैत १० मंगलवार १२:५०
1.24K
shares
shares
एजेन्सी । कोलम्बियाको दक्षिणी क्षेत्रमा सैनिक जवानहरू बोकेको एउटा सैन्य विमान उडान भर्ने क्रममा दुर्घटनाग्रस्त भएको छ । आइतबार भएको यस दुखद दुर्घटनामा ठूलो संख्यामा मानवीय क्षति भएको र धेरै व्यक्तिहरू घाइते भएको अन्तर्राष्ट्रिय सञ्चारमाध्यमहरूले जनाएका छन् ।
कोलम्बियाका रक्षामन्त्री पेड्रो ए सान्चेजका अनुसार ‘हर्कुलस’ नामको उक्त सैन्य विमान पुएर्टो लेगुइजामो बाट उडान भर्ने क्रममा दुर्घटनामा परेको हो । विमानले सैनिक जवानहरू ओसारपसार गरिरहेको थियो । रक्षामन्त्रीले घटनाप्रति गहिरो दुःख व्यक्त गर्दै सैन्य टोलीहरू घटनास्थलमा पुगिसकेको जानकारी दिनुभएको छ ।
दुर्घटनामा परेकाहरूको यकिन संख्याबारे फरक-फरक विवरणहरू बाहिर आएका छन् । कोलम्बियाली एयरोस्पेस फोर्सले सामाजिक सञ्जाल एक्स मार्फत ६ जना चालक दलका सदस्यहरूको मृत्यु भएको पुष्टि गरेको छ । यद्यपि, समाचार संस्था रोयटर्सले सैन्य स्रोतलाई उद्धृत गर्दै सोमबार साँझसम्म मृतकको संख्या ६६ पुगेको जनाएको छ । कोलम्बियाको ठूलो पत्रिका एल टिएम्पो ले विमानमा कम्तीमा १२० जना सवार रहेको उल्लेख गरेको छ ।
अहिले घटनास्थलमा तीव्र रूपमा उद्धार कार्य भइरहेको । घाइतेहरूलाई उपचारका लागि सैन्य अस्पताल लगिएको । घटनाको यकिन कारण अझै खुल्न सकेको छैन र अनुसन्धान जारी छ । गत फेब्रुअरीमा पनि बोलिभियाली वायुसेनाको हर्कुलस विमान दुर्घटना हुँदा दर्जनौँको मृत्यु भएको थियो । कोलम्बियाको यो घटनालाई सोही प्रकृतिको अर्को ठूलो सैन्य विमान दुर्घटनाका रूपमा हेरिएको छ । घटनाको विस्तृत विवरण आउन अझै बाँकी छ ।
