वीरगन्जको मुख्य सडकमा चल्यो दर्जन डोजर, करिब १२०० घरटहरा भत्काइँदैभाडा नबढाए देशभरका यातायात सेवा अवरुद्ध गर्ने यातायात व्यवसायी राष्ट्रिय महासंघको घोषणा
२०८२ चैत ११ बुधवार १७:२८
672
shares
shares
काठमाडौं । इन्धनको मूल्य बढेपछि सार्वजनिक यातायात व्यवसायीहरूले भाडा समायोजन गर्न सरकारलाई दबाब दिएका छन्। नेपाल यातायात व्यवसायी राष्ट्रिय महासंघ ले तत्काल निर्णय नभए देशभर यातायात सेवा प्रभावित हुन सक्ने चेतावनी दिएको छ।
महासंघले जारी गरेको विज्ञप्तिमा नेपाल आयल निगम ले चैत २ गते रातिदेखि लागू हुने गरी डिजेलमा १० रुपैयाँ र पेट्रोलमा १५ रुपैयाँ मूल्य बढाएकोप्रति गम्भीर ध्यानाकर्षण भएको उल्लेख छ। मूल्यवृद्धिपछि भाडा समायोजन गर्न सम्बन्धित निकायलाई आग्रह गरिए पनि अहिलेसम्म कुनै निर्णय नभएको महासंघको भनाइ छ ।
यता यातायात व्यवस्था विभाग ले पनि भाडा पुनरावलोकनका लागि भौतिक पूर्वाधार तथा यातायात मन्त्रालय लाई सिफारिस पठाइसकेको छ। विभागका अनुसार २०६५ सालदेखि लागू वैज्ञानिक प्रणालीअनुसार विभिन्न १३ सूचकका आधारमा यात्रुवाहक सवारीमा ११.३३ प्रतिशत, तराई क्षेत्रमा मालवाहकमा ८.८१ प्रतिशत र पहाडी क्षेत्रमा १४.२९ प्रतिशतसम्म भाडा बढाउनुपर्ने देखिएको छ।
महासंघले २०७२ सालयता भाडा समायोजन नभएको उल्लेख गर्दै हाल व्यवसायीहरूले दैनिक ठूलो घाटा बेहोर्दै सेवा सञ्चालन गरिरहेको दाबी गरेको छ।
महासचिव डेकनाथ गौतम ले सरकारबाट छिटो निर्णय नआए सेवा बन्द गर्नुपर्ने अवस्था आउन सक्ने चेतावनी दिएका छन्। साथै, विभागको सिफारिसअनुसार व्यवसायीहरूले स्वघोषणा गरेर भाडा समायोजन गर्ने विकल्प पनि खुला राखिएको उनले बताएका छन् ।
महासंघले यथाशीघ्र भाडा समायोजन नगरे देशभर सार्वजनिक यातायात सेवा प्रभावित हुने स्पष्ट संकेत दिएको छ।
