बागलुङ । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले वर्तमान निर्वाचनलाई राष्ट्र रक्षा र स्वाधीनताको पक्षमा उभिने असाधारण अवसरका रूपमा लिनुपर्ने बताउनुभएको छ ।

बागलुङको बुर्तिबाङमा आयोजित कार्यक्रममा उहाँले राजनीतिक दल र जनताले २०८४ सालमा निर्वाचन चाहेको भए पनि अहिलेको निर्वाचन बाध्यात्मक परिस्थिति सिर्जना भएपछि हुन गएको बताउनुभयो ।

भदौ २३ र २४ गतेका घटनाले देशमा भयावह अवस्था सिर्जना गरेको उल्लेख गर्दै उहाँले त्यसबेला राजनीतिक नेतृत्वले विशेष गरी आफू र सहसंयोजक माधव नेपालले विवेक प्रयोग गरेर विशेष पहल लिएर संकटबाट जोगाएको दाबी गर्नुभयो ।

‘२४ गतेको त्यो घटनाको उद्देश्य केवल जलाउने र लुट्नेमात्रै थिएन, राष्ट्रपति हटाएर देशमा कठपुतली सरकार बनाउने र नेपाललाई युक्रेनजस्तै अवस्थातर्फ धकेल्ने योजना थियो भन्ने हामीले थाहा पायौं,’ उहाँले भन्न्भयो । यो घटनाबाट संविधान केही हदसम्म ‘घाइते’ भएको उल्लेख गर्दै उहाँले अब त्यसको रक्षा गर्ने जिम्मेवारी राष्ट्रवादी शक्तिको काँधमा आएको बताउनुभयो ।

संयोजक प्रचण्डले यो निर्वाचन सामान्य प्रतिस्पर्धा नभई विदेशी शक्तिको इसारामा देशलाई अस्थिर बनाउन खोज्ने र राष्ट्रवादी शक्ति बलियो बनाउन चाहनेबीचको लडाइँ भएको बताउनुभयो । ‘भदौ २४ देखि २६ सम्म राज्य कसले चलाएको थियो भन्ने गम्भीर प्रश्न उठेको छ,’ प्रचण्डले भन्नुभयो, ‘यो निर्वाचन देशको नेतृत्व जनताकै हातमा छ भन्ने स्थापित गर्ने लडाइँ हो ।’

उहाँले विश्व राजनीति नयाँ चरणमा प्रवेश गरिसकेको उल्लेख गर्दै नेपालजस्तो सानो देश पनि ठूला शक्तिको प्रतिस्पर्धाका लागि दुरुपयोग हुन नहुने बताउनुभयो । ‘नेपालको खनिज वा स्रोतसाधनभन्दा पनि यसको भूगोल अन्यत्रको द्वन्द्व अघि बढाउन प्रयोग हुन सक्छ भन्ने खतरा देखिएको छ,’ उहाँले भन्नुभयो ।

युक्रेन युद्ध र भेनेजुएलाका घटनाको उदाहरण दिँदै उहाँले विदेशी हस्तक्षेपको जोखिमप्रति सजग रहन आग्रह गर्नुभयो । ‘साँढेको जुधाइ, बाच्छाको मिचाइ नहोस् भन्ने चिन्ता हामीमा छ,’ उहाँले भन्नुभयो ।

निर्वाचनलाई राष्ट्र र स्वाधीनताको रक्षा गर्ने अवसरका रूपमा लिन आह्वान गर्दै उहाँले जनतालाई एकजुट भएर देशविरुद्धका जालझेल र षड्यन्त्र रोक्न सक्रिय हुन आग्रह गर्नुभयो ।