काठमाडौं: राष्ट्रपतिको कार्यालय शीतल निवासमा राष्ट्रपति रामचन्द्र पौडेलबाट पुष्पकमल दाहाल प्रचण्ड नेतृत्वको गठबन्धन सरकारका नवनियुक्त मन्त्रीहरुले पद तथा गोपनीयताको शपथ लिएका छन् ।
शपथ लिनेहरुमा नेपाली कांग्रेसबाट ४ जना रहेका छन् । कांग्रेसबाट पूर्णबहादुर खड्का उपप्रधान तथा रक्षा, प्रकाशशरण महत अर्थ, रमेश रिजाल उद्योग वाणिज्य तथा आपूर्ति र सीता गुरुङ सहरी विकास मन्त्री भएका छन् ।
कांग्रेसले ८ वटा मन्त्रालय पाएकोमा शुक्रबार ४ जनाले शपथ लिए छन् । माओवादीबाट शक्ति बस्नेतले ऊर्जा, जलस्रोत तथा सिंचाइ मन्त्रालयको जिम्मेवारी पाएका छन् ।
दाहालले शुक्रबार सातौँ पटक पुनर्गठन गर्दा पनि मन्त्रिपरिषद्ले अझै पूर्णता भने पाउन सकेन । उनको जिम्मामा अझै ६ वटा मन्त्रालय बाँकी छन् ।
पुस ११ मा प्रधानमन्त्रीको शपथ लिएसँगै दाहालले त्यसपछि दोस्रो पटक माघ ३, तेस्रो तथा चौथो पटक १४ र २३, माघमा मन्त्रिपरिषद् पुनर्गठन गरेका थिए । उनले त्यसपछि १४ र १६ फागुनमा पनि मन्त्रिपरिषद् पुनर्गठन गरेका थिए ।
नेपाली कांग्रेसबाट पूर्णबहादुर खड्का-उपप्रधान तथा रक्षा मन्त्री, डा. प्रकाश शरण महत-अर्थमन्त्री, रमेश रिजाल-उद्योग वाणिज्य तथा आपूर्ति मन्त्री, सीता गुरुङ-शहरी विकास मन्त्री बनेका छन् ।
त्यस्तै नेकपा माओवादी केन्द्रबाक्कट नारायणकाजी श्रेष्ठ-उपप्रधान तथा गृहमन्त्री, शक्ति बस्नेत-ऊर्जा, जलस्रोत तथा सिँचाइ मन्त्री, रेखा शर्मा-सञ्चार तथा सूचना प्रविधि मन्त्री, सुदन किराती-संस्कृति, पर्यटन तथा नागरिक उड्डयन मन्त्री, अमनलाल मोदी-संघीय मामिला तथा सामान्य प्रशासन मन्त्री बनेका छन् ।
एकीकृत समाजवादीबाट बेदुराम भुसाल- कृषि तथा पशुपंक्षी विकास मन्त्री, प्रकाश ज्वाला-भौतिक पूर्वाधार तथा यातायात मन्त्री बनेका छन् भने जसपाबाट अशोक राई- शिक्षा, विज्ञान तथा प्रविधि मन्त्री बनेका छन् ।
त्यस्तै लोसपाबाट शरद सिंह भण्डारी-श्रम, रोजगार तथा सामाजिक सुरक्षा मन्त्री, नाउपाबाट रञ्जिता श्रेष्ठ-भूमि व्यवस्था, सहकारी तथा गरिबी निवारण मन्त्री बनेका छन् भने नेसपाबाट महिन्द्र राय यादव-महिला, बालबालिका तथा ज्येष्ठ नागरिक मन्त्री बनेका छन् ।
त्यसैगरी बाँकी मन्त्रालय प्रधानमन्त्रीसँग नै रहेको छ जसमा कानुन, न्याय तथा संसदीय मामिला मन्त्रालय परराष्ट्र मन्त्रालय, वन तथा वातावरण मन्त्रालय, स्वास्थ्य तथा जनसंख्या मन्त्रालय, युवा तथा खेलकुद मन्त्रालय र खानेपानी मन्त्रालय रहेका छन् ।
साभार : अखबार नेपाल
