त्रिवि स्ववियू सभापतिलाई सिनेटबाट नहटाउनु : सर्वोच्च अदालतमहाशिवरात्रिको तयारीस्वरुप पशुपति क्षेत्रमा थालियो सरसफाइ
२०८२ माघ २४ शनिवार १५:०२
1.24K
shares
shares
काठमाडौं । महाशिवरात्रिको तयारीस्वरुप हिन्दू धर्मावलम्बीका आराध्यदेव पशुपतिनाथ मन्दिर क्षेत्रको सरसफाइ गरिएको छ । वागमती सफाइ महाअभियानको ६६५औँ हप्ताका अवसरमा महाशिवरात्रिलाई लक्षित गरी पशुपति क्षेत्रअन्तर्गत सूर्यघाट, आर्यघाट र राममन्दिर आसपासका क्षेत्रमा सफाइ गरिएको हो ।
भष्मेश्वरघाटदेखि ड्यामसम्मको वागमती किनारमा बढी फोहोर देखिएकाले उक्त क्षेत्रमा अधिकार सम्पन्न वागमती समितिले डोजर प्रयोग गरी सफाइ गरेको छ । २०७० जेठ ५ देखि सुरु भएको वागमती सफाइ महाअभियान प्रत्येक शनिबार निरन्तर सञ्चालन हुँदै आएको छ ।
भूकम्प, नाकाबन्दी र कोरोनाजस्ता चुनौतीपूर्ण अवस्थामा समेत अभियान अवरुद्ध नभएको उल्लेख गर्दै, चाडपर्व, जाडो र झरीका दिनमा पनि हरेक शनिबार बिहान अभियानकर्मी वाग्मती नदी किनारमा भेला भई सफाइ गर्दै आएका छन् ।
‘देशका लागि हप्तामा दुई घण्टा स्वयंसेवा’ भन्ने नाराका साथ अभियानकर्मीहरू प्रत्येक हप्ता वागमती नदी किनारमा जुट्ने गरेका छन् । यस वर्ष फागुन ३ गते महाशिवरात्रि परेको छ ।
