काठमाडौँ । राष्ट्रिय स्वतन्त्र पार्टी कोसी प्रदेश समितिले युवा नेता रवीन्द्र ओझालाई खोटाङको संगठन निर्माणको जिम्मेवारी दिएको छ ।
राष्ट्रिय स्वतन्त्र पार्टी प्रदेश समितिले नेता ओझालाई खोटाङमा भएका जिल्ला प्रदेश समिति, क्षेत्रीय समिति र तदर्थ नगर समितिसँग समन्वय गरी जिल्लाको संगठन निर्माण गर्ने जिम्मेवारी दिएको राष्ट्रिय स्वतन्त्र पार्टी कोसी प्रदेश महामन्त्री लालविक्रम थापाले जानकारी गराए ।
राष्ट्रिय स्वतन्त्र पार्टी खोटाङले साउन अन्तिम सातादेखि संगठन निर्माण व्यापक बनाउने कार्ययोजना तय गरेको छ । असोजसम्ममा जिल्ला भेला गरिसक्ने योजना तय भएको र जिल्ला भेलाले रास्वपा खोटाङको संयोजक र सहसंयोजक चयन गर्ने नेता ओझाले बताएका छन् । त्यसपछि पार्टी जिल्ला अधिवेशन गरिनेछ ।
जिल्ला अधिवेशनले पार्टी सभापति र उपसभापति निर्वाचित गर्ने नेता ओझाले बताए । सभापति र उपसभापति चयनपछि संयोजक र सहसंयोजक पद खारेज हुनेछ ।
यसैगरी राष्ट्रिय स्वतन्त्र पार्टी खोटाङ काठमाडौँ सम्पर्क विभागको तदर्थ समिति पनि गठन भइसकेको छ । उक्त सम्पर्क विभागको सभापतिमा रुद्र जोशी रहेका छन् । खोटाङबाट काठमाडौँ आएर बसोबार गर्ने धेरै युवा तथा खोटाङे जनताहरु सक्रिय रुपमा सम्पर्क विभागमा आवद्ध भइसक्नु भएको छ र आवद्ध हुने क्रम निरन्तर चलिरहेको सभापति जोशीले बताउनु भएको छ ।